Sudan yaradılışın təkamülə dəlil olması yalanı

Həqiqətən, Biz insanı qarışıq bir nütfədən (sudan) yaratdıq. Biz onu imtahana çəkəcəyik. Biz onu eşidən, görən yaratdıq. (İnsan surəsi, 2)

Təkamül yolu ilə yaradılış yalanını müdafiə edənlər bir çox ayədə keçən "insanın sudan yaradıldığına" dair ifadələri öz iddialarına dəlil kimi göstərməyə çalışır, bütün canlıların sudan əmələ gəldiyini iddia edirlər. İnsanın yaradılış mərhələlərindən bəhs edən başqa ayələrə də nəzər yetirdikdə Quranda təkamülə işarə edən heç bir məlumatın olmadığını aydın şəkildə görürük:

Ey insanlar! Öləndən sonra yenidən diriləcəyinizə şübhəniz varsa (ilk yaradılışınızı yada salın). Həqiqətən, Biz sizi torpaqdan, sonra mənidən (nütfədən), sonra laxtalanmış qandan, daha sonra müəyyən, tam bir şəklə düşmüş və düşməmiş bir parça ətdən yaratdıq ki, (qüdrətimizi) sizə göstərək. İstədiyimizi ana bətnində müəyyən bir müddət saxlayar, sonra sizi uşaq olaraq çıxardarıq. Sonra yetkinlik çağına yetişəsiniz deyə (sizi böyüdərik). Kiminiz (bu həddə çatmamış) vəfat edər, kiminiz də ömrün elə bir rəzil (ən ixtiyar) çağına çatdırılar ki, vaxtilə bildiyini bilməz olar. Sən yer üzünü qupquru görərsən. Biz ona yağmur endirdiyimiz zaman o, hərəkətə gəlib qabarar və hər növ gözəl bar gətirər. (Həcc surəsi, 5)

Ayədə bir insanın yaradılış mərhələləri təsvir edilir.

Birinci mərhələni insan orqanizminin əsas mineral və elementlərini özündə ehtiva edən torpaq təşkil edir.

İkinci mərhələdə isə bu elementlər ana bətnindəki yumurtanı dölləndirmək üçün müvafiq quruluş və genetik məlumata sahib olan spermalardan ibarət və Quranda qarışdırılmış su kimi təsvir edilən mənidə toplanır. Bir sözlə, insanın əsas xammalı torpaqdır. Torpağın əsası bir damcı mənidə insanı meydana gətirəcək şəkildə toplanmışdır. Ayədə bu "su" mərhələsindən dərhal sonra insanın ana bətnindəki inkişaf mərhələləri göstərilmişdir. Halbuki təkamül nəzəriyyəsi həyatın guya öz-özünə suda başlamasından insanın ortaya çıxmasınadək milyonlarla xəyali mərhələ (ilk hüceyrə, təkhüceyrəlilər, çoxhüceyrəlilər, onurğasızlar, onurğalılar, sürünənlər, məməlilər, primatlar və s. və bunların saysız-hesabsız keçid mərhələləri kimi) olduğunu qəbul edir. Ayədə bəhsi keçən yaradılış mərhələlərinin ardıcıllığında isə belə bir məlumat yoxdur. İnsanın bir damla sudan ələqə (laxtalanmış qana) çevrildiyi bildirilir.

Aydın məsələdir ki, ayədə insanın təkamül mərhələlərindən keçməsi deyil, ana bətnindən əvvəlki, ana bətnindəki və dünyaya gəldikdən sonrakı yaradılış mərhələləri təsvir edilir.

Bəzi şərhçilər bu ayələrdəki "canlıların sudan yaradılması" ifadəsinin təkamül prosesinin izahı olduğunu zənn edirlər. Halbuki bu, çox yanlış izahdır. Ayələrdə canlıların sudan yaradıldığı və əsas quruluş elementlərinin su olduğu xəbər verilir. Belə ki, müasir biologiya suyun dünyadakı hər canlının bədəninin ən vacib faktoru olduğunu ortaya qoymuşdur. İnsan bədəninin təxminən 70%-i sudur. Hər canlının bədənindəki su sayəsində hüceyrədaxili, hüceyrələrarası və toxumalararası əlaqə təmin edilir. Su olmadan həyat ola bilməz. İnsanın və digər canlıların sudan yaradıldığını bildirən digər ayələrdə də yenə təkamül nəzəriyyəsinə əsas verəcək bir məna yoxdur. Aşağıdakı ayələrdən də bunu aydın görə bilərik:

Məgər kafir olanlar göylə yer bitişik ikən Bizim onları ayırdığımızı, hər bir canlını sudan yaratdığımızı bilmirlərmi?! Yenə də iman gətirməzlər? (Ənbiya surəsi, 30)

Aşağıdakı ayələrdə isə bir damla suyun nütfə (sperma) olduğu açıq şəkildə ifadə edilir:

(İnsanlardan və heyvanlardan ibarət) iki cifti (hər bir cütü) erkək və dişi olaraq yaradan Odur – (Bir qətrə) nütfədən axıb tökülərkən. (min nutfətin iza tumna)

Yenidən diriltmək də Ona aiddir! (Nəcm surəsi, 45-47)

min : dən, dan

nutfətin : nütfə, bir damla

iza : -dığı zaman

tumna : mənini tökmək

Məgər o tökülən bir qətrə nütfə deyildimi?! (nutfətən min məniyyin yumna) (Qiyamə surəsi, 37)

nutfətən : nutfə, bir damla su

min : dən, dan

məniyyin : məni

yumna : atılıb tökülən

Elə isə insan nədən yaradıldığına bir baxsın! O, axıb tökülən bir sudan yaradılmışdır. (Xuliqa minma’in dəfiq) (O su kişilərin) bel sümüyündən, (qadınların isə) köks sümüyündən çıxar! (Tariq surəsi, 5-7)

xuliqa : yaradıldı

min : dən, dan

main : su

dəfiq : birdən boşalan, tökülən, birdən axıdılan, axıdılan.

İlk öncə torpaqdan, sonra sudan yaradılmanın təkamül yolu ilə yaradılışa dəlil olması yalanı

“…Əvvəlcə səni torpaqdan, sonra bir qətrə sudan (mənidən) yaratmış, daha sonra səni adam şəklinə (insan qiyafəsinə) salmış Allahı inkarmı edirsən?” (Kəhf surəsi, 37)

Ömər Nasuhi Bilmən eyni ayəni bu şəkildə təfsir edir:

“... Əcdadın hz. Adəmi (torpaqdan) yaradan, sonra da səni (nütfədən), vücuduna ən yaxın maddə olan bir damla mənidən (yaradan, sonra da səni kişi qiyafəsinə salan), mütəaddit ətvari həyatiyə (bəzi həyati vəziyyətlər) nəticəsində səni tam, baliğ (yetkin) bir insan kimi yetişdirən Xaliqi-Kərimi (inkarmı edirsən), çünki axirət həyatını inkar etmək onun zahir olacağını xəbər verən və ona qadir olan Allah Təalayı inkar etməkdir...”

Ayələrdəki “torpaqdan yaradılış” ifadəsi hz.Adəmin yaradılışını, sudan yaradılış isə yetkin insanın spermadan başlayan inkişaf dövrünü açıqlayır. Allah ilk bəşəri palçıqdan yaratdığını bildirir. Hz. Adəmin yaradılışından xəbər verən ayədə yalnız bir mərhələdən bəhs edilir:

Xatırla ki, bir zaman Rəbbin mələklərə belə demişdi: “Mən quru və qoxumuş qara palçıqdan insan yaradacağam! Mən ona surət verib ruhumdan üfürdüyüm zaman siz ona səcdə edin!” (Hicr surəsi, 28-29)

Qurandakı yaradılış mərhələlərini, ardıcıllıqla izah edilən prosesləri diqqətlə nəzərdən keçirdikdə təkamülə işarə edən heç bir məlumat olmadığı dərhal anlaşılır.

Quranda hz. Adəmin təkamül mərhələsi ilə yaradılmadığını açıq şəkildə bildirən başqa ayələr də var. Bu ayələrin birində belə buyurulur:

Allah yanında İsa da Adəm kimidir. Allah onu torpaqdan yaratdı. Sonra ona: “(Bəşər) ol!” – dedi, o da oldu. (Ali İmran surəsi, 59)

Yuxarıdakı ayədə Allah hz.Adəmlə hz. İsanın eyni şəkildə yaradıldıqlarını bildirir. Daha əvvəl də qeyd etdiyimiz kimi, hz.Adəm hər hansı bir əcdadı olmadan, torpaqdan və Allahın "Ol" deməsi ilə var edilmişdir. Hz. İsa isə atası olmadan, Allahın istəməsi ilə "Ol" əmri ilə yaradılmışdır.

Torpaqdan və sudan yaradılışın bildirildiyi digər ayələrdə də yuxarıda qeyd etdiyimiz kimi, insanın təkamül mərhələləri deyil, insanın yaradılışının ana bətninə düşməmişdən əvvəlki, ana bətnindəki və doğumdan sonrakı mərhələləri təsvir edilir:

Ey insanlar! Öləndən sonra yenidən diriləcəyinizə şübhəniz varsa (ilk yaradılışınızı yada salın). Həqiqətən, Biz sizi torpaqdan, sonra mənidən (nütfədən), sonra laxtalanmış qandan, daha sonra müəyyən, tam bir şəklə düşmüş və düşməmiş bir parça ətdən yaratdıq ki, (qüdrətimizi) sizə göstərək. İstədiyimizi ana bətnində müəyyən bir müddət saxlayar, sonra sizi uşaq olaraq çıxardarıq. Sonra yetkinlik çağına yetişəsiniz deyə (sizi böyüdərik). Kiminiz (bu həddə çatmamış) vəfat edər, kiminiz də ömrün elə bir rəzil (ən ixtiyar) çağına çatdırılar ki, vaxtilə bildiyini bilməz olar. Sən yer üzünü qupquru görərsən. Biz ona yağmur endirdiyimiz zaman o, hərəkətə gəlib qabarar  və hər növ gözəl bar gətirər. (Həcc surəsi, 5)